CEBU CITY- Nindot ug duna matud pay positibong epekto ang sunod-sunod nga linog nga unang miigo sa Zambales, Pampanga, Metro Manila, ug uban pang parte sa Luzon kagahapon. Ug gisundan kini sa lain pang 6.1 magnitude earthquake sa San Julian Eastern Samar nga nasinati sa kasikbit nga rehiyon lakip na sa Metro Cebu.
Kini ang pamahayag ni Robinson Giorgio, ang OIC sa Philippine Institute of Volcanology and Seismology (Phivolcs-7) sa pakighinabi sa Bombo Radyo Cebu.
Sukwahi sa kahadlok nga gibati sa kadaghanan, giingon ni Giorgio nga dunay positibo kini nga epekto. Mas ma-practice pa og maayo ang mga earthquake drill sa matag estbalisamento. Mas mahimong open na usab matud pa ang komunikasyon kalabot niini.
Sigon pa ni Giorgio nga dili ang linog ang kahadlokan sa mga tao inay ang ilang mga balay nga basin maguba. Gani usa kini matud pa ka dakong leksyon nga mas palig-onon pa ang construction sa balay ug mga building para kung dunay linog dili kini dali nga maguba.
Dugang pa ni Giorgio nga dili angay kini kahadlokan tungod kay ang linog usa ka natural phenomenon kung diin naumol ang mga islands o isla ug mga coastal uplift nga nakapanindot usab sa kalikupan ug na enjoy sa kadaghanan.
Apan sa gihapon mipahinumdom si Giorgio sa publiko sa mga saktong buhaton kung dunay linog. Tataw niini nga dili mugawas sa building kung wala pa nahuman ang pagtay-og ug kung walay advice nga pahiklinon ug kung wala usab damages nga namugna.
Samtang, business as usual ug walay nataho nga samdan sa nahitabong paglinog nga nasinati sa Cebu.
