CEBU CITY — Moabot sa 40 ka mga panimalay ang naugdaw human niulbo ang dakong sunog kaganiha sa Upper Tabok, Brgy. Tabok, dakbayan sa Mandaue.
Unang nadawat sa kabumberuhan ang alarma sa wala pa ang alas-9 sa buntag ug giisa kini pagkataudtaod sa third alarm.
Matud sa Mandaue City Fire Department nga padayon pang gisuta sa mga kabumberuhan kung unsa man ang hinungdan sa maong dakong sunog.
Samtang gi-verify usab nila ang taho gikan sa mga residente nga nitumaw ang sunog gumikan lang sa nabuto nga transformer sa kuryente.
Usa mga nakitang kalisdanan sa mga kabumberuhan mao ang kahuot sa dalan ug mas daling nikaylap ang kayo gumikan sa kusog nga hangin.
Apan napalong kini human sa dul-an duha ka oras nga pagpakigkumbate sa mga kabumberuhan.
Gibanabanang mokabat sa P280,000 ang natalang danyos samtang daling gihatagan og first aid ang mga nasamdan.
Nangayo og tabang ang kapitan sa Barangay Tabok, dakbayan sa Mandaue sa katawhan nga tabangan sila human nga apektado sa dakong sunog kaganiha ang 295 ka mga residente sa Upper Tabok.
Namatikdan ni Kap. Dario Tariman nga kagahapon adunay pagpalong-palong sa source sa kuryente ug mas nisamot kini sa dihang mibuto ang transformer niini.
Matud ni Tariman nga gipanag-iya sa kabanay nga Vega ang compound diin anaa sa 50 ka mga panimalay ang nagpuyo.
Gawas sa mismong mga panimalay, daling naugdaw ang ubang mga balay gumikan kay hinimo man ang kadaghanan sa lght materials.
Sa pagkakaron, gipahiklin sa covered court sa barangay ang mga apektadong residente ug gitunulan nang daan og hinabang gikan sa City Social Welfare and Development Office.
