Sunog nga miigo sa dakbayan sa Mandaue, nakaangol og duha ka indibidwal

MANDAUE CITY-Gikatahong duha ang samdan sa miulbong sunog sa Sitio Chicos, Barangay Labogon, dakbayan sa Mandaue gahapong adlawa, Marso 3, 2024.

Base sa taho sa Mandaue City Fire Station, nagsugod ang sunog sa balay nga gipanag-iya ni Fortunato Managbanag ingon man nga giisa kini sa first alarm.

Nasayran nga nakaangkon og samad ang duha human kini misuway sa pag-ikyas sa midilaab nga balay.

Giila ang duha nga sila si Jimrod Bica, kinsa nakaangkon og samad sa tuo nga tuhod ug si Zophia Chua, kinsa adunay samad sa wala ug tuo nga pulso.

Subay niini, gibanabanang mokabat sa P156,000 ang danyos, ingon man nga padayon sa gihapon nga gisuta sa kabomberohan sa Mandaue City ang hinungdan sa miulbong sunog sa Barangay Labogon.