CEBU CITY — Mokabat sa P3-Milyon ang kinatibuk-an nga danyos sa sunog nga miulbo kagahapon sa hapon sa may P. Lopez St., Brgy. Kalubihan, dakbayan sa Sugbo.
Suma pa sa report ni FO2 Fullbert Navarro sa Bureau of Fire Protection nga nagpadayun gihapon ang pakisusi sa hinungdan sa pag-ulbo sa sunog.
Niulbo ang dakong ka’yo sa takna nga 4:57 sa hapon ug giisa kini pasado alas-5 ngadto sa second alarm.
Pagkalabay sa kapin usa ka oras, nakontrolar ug napawong kini sa mga kabumberuhan.
Nasayran nga gipanag-iya ni Hanima Tasan ang maong luna ug gi-okupar kini sa iyang mga kaubanan.
Gibanabanang anaa sa 250 square meters ang gilapdun sa nitumaw nga sunog diin hinimo kini sa light ug concrete materials.
Hinoon, gikalipay ni Cebu City Disaster Management Head Ramil Ayuman walay naamong sa maong insidente, diin sukwahi kini sa mga huhungihong nga natanggong ang usa ka mag-inahan sa sulod.
Dugang pa niini nga mikanaug dayon ang duha ka babaye sa dihang ni-ulbo ang sunog, apan nakaangkon og samad sa tuong kamut ang inahan, kinsang usa ka 30-anyos nga muslim.
Samtang nga nahatagan na og pagkaon ang mga pamilya nga nabiktima sa sunog gikan sa Department of Social Welfare and Services sa City Government. /with reports by Bombo Jun Salde and Bombo Joann Gantalao/ekp/gn
