Mibuto ug nasunog ang usa ka supertanker nga nagkarga og kapin sa duha ka milyon ka bariles sa Strait of Hormuz human nibangga sa naval mine.
Kini sumala sa taho gikan sa Islamic Revolutionary Guard Corps (IRGC) sa Iran.
Matod sa IRGC, ang maong barko gituohang misulay sa pag-agi sa usa ka sirado nga agianan sa tubig nga walay pagtugot, uban ang tabang sa militar sa Estados Unidos.
Bisan tuod wala pa mapamatud-i sa laing tinubdan ang maong taho, wala pay opisyal nga pamahayag nga gipagawas ang US Central Command (CENTCOM) o ang UK Maritime Trade Operations (UKMTO) mahitungod sa kahimtang sa mga tripulante o sa gidak-on sa kadaot.
Ang Strait of Hormuz nahimong sentro sa tensyon tali sa Washington ug Tehran, tungod kay kini nga agianan sa tubig alang sa tibuok kalibotan nga pamatigayon sa lana ug liquefied natural gas.
Sukad nagsugod ang panagbangi niadtong Pebrero, gipakusog sa Iran ang pagpahunong sa mga barko ug ang pagbutang og mga mina sa dagat, samtang nagpahamtang usab ang US og blockade sa mga pantalan sa Iran aron putlon ang kita sa nasod gikan sa lana.
