Gibutyag ni Fritz Valiente, ang usa sa mga survivor sa nahitabong pagdahili sa landfill nga nahimutang sa Barangay Binaliw 1, nga wala gihapon siya mawagtangi og pag-laom taliwala sa mga nahiaguman niini nga natabunan siya sa mga basura.
Matud ni Valiente, nga grabi ang kalisod nga iyang gisagubang sa dihang nahitabo ang insidente, apan nagpabilin kining malig-on alang sa iyang pamilya.
Gisaysay sa biktima nga nagtrabaho siya sa kompanya isip kabahin sa finance department nga nahimutang sa 2nd Floor sa maong opisina.
Sigon niini nga samtang nagtrabaho siya, kalit lang nga adunay midahunog gikan sa ibabaw nga bahin hinungdan nga dali siyang nakamatikod og mitago sa ilawom sa lamesa.
Nasayran nalang niini nga napiit ang iyang tiil sa mga debris nga nangatagak gikan sa ibabaw nga bahin, dali usab siyang nagpakitabang sa mga kauban pinaagi sa pagdukdok og mga butang nga makamugna og kasaba aron matabangan siya.
Gihimug-atan sa survivor nga aduna gayuy pagpabaya ang operator niini sa nahitabong pagdahili sa landfill, apan midugang nga dili tanan ipasangil kanila gumikan usab kay nagkalain-lain nang kompanya ang nagpadagan niini og dili lang ang Prime Intergrated Waste Solution INC,.
Panawgan ni Valiente sa mga anaa sa renda sa pangagamhanan nga hatagan unta sila og tabang pinansyal hilabi na sa mga nabiktima og mga empleyado nga nawad-an og trabaho.
Samtang, nisaka na ngadto sa 20 ang ihap sa mga namatay sa pagkahugno sa Binaliw landfill, ug nagpadayon pa gihapon ang mga operasyon sa pagkuha sa mga gikatahong missing, usa ka semana human nahugno ang dumpsite.
Matod sa mga awtoridad, ang pinakabag-o nga mga namatay nakuha gikan sa mas lawom nga mga bahin sa landfill samtang ang mga retrieval team nagtrabaho sa mga nahugno nga basura ug mga debris.
