Namatay ang 24-anyos nga suspek sa makamatay nga pagpamusil sa Krakow, Poland, nga miresulta sa kamatayon sa unom ka tawo niadtong Nobyembre 7.
Ang 24-anyos nga suspek, nga giila nga si Michał Oksiński, nakaangkon og grabeng mga samad human gipusil sa kapulisan samtang naghimo sa krimen sa maong siyudad.
Samtang nagpadayon pa ang beripikasyon sa mga awtoridad kung ang maong pagpamusil angay ba nga ikonsiderar nga terrorist attack, nagdeklarar ang nasud og duha ka adlaw nga nasudnong pagbangotan agig pasidungog sa mga namatay.
Nahitabo ang pagpamusil sa nag-unang merkado sa Krakow, usa ka popular nga destinasyon sa mga turista ug lokal nga residente.
Sumala sa report, gipamusil sa suspek ang mga tawo gikan sa sulod sa iyang sakyanan.
Unom ka tawo ang namatay sa maong insidente, lakip ang upat ka babaye ug duha ka lalaki, samtang 16 pa ang naangol, lakip na ang duha ka pulis.
Dugang pa, atol sa pagpadayon sa imbestigasyon, nakadiskubre ang kapulisan og tulo ka patayng lawas sulod sa pinuy-anan sa suspek.
Giila ang mga biktima nga mga sakop sa pamilya ni Oksiński.
Padayon pang gisusi sa mga awtoridad ang mga sirkumstansiya ug posibleng motibo luyo sa maong makamatay nga insidente.
