Cebu City-Mag-atubang sa kaso nga multiple murder ang suspek sa pagpatay sa managsoon nga senior citizen sa Brgy. Perrelos, Carcar, Cebu.
Kini human nga gipanigbas sa suspek nga si Emilio Manayaga, 45 anyos, giingong usa ka ex-convict, ang mga biktima nga sila si Carmelito Garces, Conrado Garces, ug Euferonio Garces.
Matud sa deputy chief sa Carcar Police Station nga si PSI Jade Sumugat nga personal grudge ang ilang nakitang motibo sa pagpatay sa magsoon tungod sa kasuko sa suspect niini ngadto sa mga biktima.
Dugay na matud pa nga nagdumot ang suspek tungod kay gipasanginlan kini nga namaligya og iligal nga shabu ug kawatan og kanding sa ilang lugar.
Gi-angkon usab ni Manayaga ang maong salaun ug andama kini nga atubangon ang kasong ipasaka batok kaniya.
Nabalhog na kini sa detention cell karon sa Carcar Police Station samtang iba-background usab sa imbestigador ang pagka ex-convict niini.
Kahinumduman nga nagduwa lamang ug dama ang 3 ka magsoon sa dihang kalit nga gisulong sa suspek ug gipanigbas sa dala niini nga sanggot. Dead on the spot ang 3.
