CEBU CITY-Gipa-ubos sa DNA testing ang duha ka mga suspek sa pagpatay kang Rhea Mae Tocmo aron masuta kung sila ba ang responsable sa makalilisang nga krimen.
Matud pa ni Police Lieutenant Colonel Gerard Ace Pelare, tigpamaba ni Police Regional Office Central Visayas (PRO 7) Chief Brigadier General Anthony Aberin, nga ang swab samples ni Simeon Gabutero ug Roberto Gabison alyas Intsik i-matched sa gikuha sa PNP Forensic Unit 7 gikan sa lawas ni Rhea Mae.
Makita sa resulta sa DNA test kon tinuod ba nga gipatay nila ang 19-anyos nga si Tocmo.
Dugang pa, nga hugot nga gimonitor ni General Anthony Aberin ang dagan sa kaso ni Tocmo nga gidumala sa Cebu City Police Office (CCPO).
Matod ni Pelare nga gihatagan nila og igong panahon ang mga imbestigador sa CCPO aron makatigom og dugang ebidensiya alang sa pagpasaka og kaso.
Giawhag sa kapulisan ang publiko ilabi na kadtong adunay impormasyon bahin sa pagpatay kang Tocmo nga modangop sa ilahang buhatan, arun makatabang sa nagpadayun nga imbistigasyon.
Una niini, sila si Gabison ug Cabutero mihimakak sa kalambigitan sa kamatayon ni Tocmo, kansang lawas gisulod sa karton ug gilabay daplin sa dalan sa Sitio Mohon, Barangay Tisa, dakbayan sa Sugbo niadtong Hulyo 17, 2023.
Sa bag-ohay lang nga pakighinabi si Cabutero namahayag nga andam siyang mokuha og polygraph test aron pagmatuod nga wala siya nagmugna-mugna og kamatuoran nga si Gabison maoy nagsugo kaniya sa pagbaligya sa selpon ni Rhea Mae sa downtown area sa dakbayan sa Sugbo.
Sa pikas bahin si Gabison hugot nga mihimakak sa pasangil.
