LAPU LAPU, CEBU-Gipasabot ni Lapu-Lapu City Mayor Junard ‘Ahong’ Chan, nga mideklarar kini og suspensyon sa klasi alang sa mga pampubliko nga tunghaan sa dakbayan gumikan sa tumang kainit sa panahon.
Matud pa sa mayor nga sa dihang na-monitor na niini ang nagkataas nga heat index, hayan, dali niini nga gipatawag ang mga school officials sa dakbayan ug mimando nga temporaryo lang una nga isuspenso ang face-to-face classes.
Sigon ni Mayor Chan nga nakasabot kini sa pag-antos, dili lamang sa mga estudyante, lakip na ang mga magtutudlo, sa kainit sa panahon hinungdan nga mas maayo nga wala na lang una’y face-to-face classes.
Nasayod usab ang mayor nga dili na maayo sa panglawas ang grabi nga kainit sa panahon hinungdan nga mimando kini sa mga tunghaan nga magpahigayon na lang una og modular learning.
Samtang, mipahimangno usab ang naasoy nga opisyal sa mga sakop sa Lapu-Lapu City Traffic Management System nga anaa kanunay sa kadalanan nga nag-man sa trapiko sa dakbayan.
Gibutyag ni Mayor Chan nga kanunay ang iyahang pagpahinumdom sa mga traffic enforcers nga magsul-ob og mga gear nga makapanalipod nila sa kainit, ingon man ang makanunayon nga pag-inom og tubig arun nga malikay sa heat stress.
