CEBU – Gibalik na sugod kagahapong adlawa ang ‘Swab-Upon-Arrival’ policy sa Sugbo human kini gikatahong gisuspenso niadtong nakalabay’ng weekend subay sa kamanduan nga gipa-agi ug ‘verbal’ sa IATF nga sundon ang gipatumang protocol alang sa mga nangabot nga inbound international travelers.
Sa gipahigayon nga press conference ni Cebu Provincial Governor Gwendolyn Garcia, gibutyag niini nga i-swab test kagahapon o karong adlawa ang mga Returning Overseas Filipinos ug Overseas Filipino Workers nga niabot sa Mactan Cebu International Airport niadtong Hunyo 19 ug Hunyo 20.
Gipunto sa Gobernadora nga magpabilin ang Provincial Ordinance 2021-05 o ang ‘swab-upon-arrival’ policy sa Sugbo sanglit kini ang balaod sa lokalidad diin ang Korte Suprema lang ang makahatag niini ug aksiyon kung dili na hatagan ug bili.
Subay niini, gipasidan-an ni Garcia ang mga concerned government agencies lakip na ang mga stakeholders nga sundon ang maong balaod sanglit mag-atubang ang dili motuman niini ug administrative ug criminal charges sama sa illegal detention, serious illegal detention ug kidnapping.
Gihimug-atan sa Gobernadora nga sundon ang ‘laws of the land’ human sa verbal order sa IATF kabahin na sa pagsunod sa kasamtangang gipatuman sa national sa testing policy sa mga ROFs ug OFWs ug ubang mga inbound international travelers. | GBS
