CEBU CITY-Wala’y nakita nga ‘negligence’ kun pagpabaya ang Balamban PNP sa bombero nga si Fire Officer 1 Orland Paul Romero kinsang tag-iya sa sakyanan kung diin namatay ang 10 anyos nga bata nga nailang si John Michael Puntenegrasa sa Brgy. Santa Cruz, lungsod sa Balamban, Cebu.
Kini ang gitino ni Police Major Christian Torres, ang hepe sa Balamban PNP subay na usab sa ilang imbestigasyon sa nahitabo.
Matud niini nga posibleng sa wala pa na ‘automatic lock’ ang sakyanan nakasulod na ang bata hinungdan nga wala na makagawas pa.
Nasayran nga ang maong bata, malnourished ug grade 1 pa tungod kay dili na kini mu-eskwela ug adto nalang sa merkado magyampongad para makakwarta tungod sa kapobrehon.
Ika-lima usab kini sa 7 ka anak ug ang inahan wala usab igo nga pangita gawas sa pagpanglabada.
Gi-abaga hinoon ni Romero ang gastos sa kamatayon sa bata diin mihatag usab kini og financial assistance.
