CEBU CITY — Blangko pa ang motibo sa kamatayon sa usa ka tindera human gipusil sa riding-in-tandem sa Dalan Manalili, sa dakbayan sa Sugbo.
Giila ang biktimang si Arlinda Garcia, gibana-banang anaa sa 60 anyos, ug lumad nga taga-Aloguinsan sa Sugbo. Nasayran nga taud-taud nang nakatag-iya si Garcia og kaugalingong tindahan sa nahisgutang dalan.
Base sa pasiunang imbestigasyon sa Carbon Police Station nga mihunong ang wala mailhi nga mga gunman sakay sa ilang motorsiklo ug kalit lang nga namusil ang backrider niini ngadto sa biktima.
Misibat dayon ang riding-in-tandem samtang nakahiagum og grabe nga samad-pinusilan sa lawas si Garcia nga miresulta sa iyang hinanaling kamatayon.
Matud sa imbestigador nga si Police Staff Sergeant Joel Perolino nga walay gikaaway si Garcia sa nangaging mga adlaw.
Narekober gikan sa nahitaboan sa krimen ang upat ka fired cartidge sa 9mm nga armas.
Dugang pa ni Perolino nga palawman pa ang imbestigasyon aron masuta kung kinsa ang mipusil ngadto ni Garcia.
Anaa na sa punerarya ang patayng lawas ni Garcia aron ipaubos sa autopsy.
