BOHOL – Patay ang usa ka tag-iya ug buwangan human nga gipa-uwanan ug bala samtang nagmaneho sa iyahang sakyanan sa Purok 4, Benigno Ave., Barangay Bu-uy, dakbayan sa Tagbilaran, Bohol.
Giila ang biktima nga si Ryan Sygue, 40 anyus, minyu, ug residente sa Lot 2 Blk 6, Camella Homes, Tagbilaran City.
Gisaysay ni Police Staff Sergeant Arnel Aralar sa Tagbilaran PNP, nga basi sa ilahang inisyal nga pakisusi sa nahitabu, giingung nagmaneho ang biktima sa dihang kalit nga gibabagan ug puti nga van ug dayun gipa-uwanan ug bala sa wala pa matinong ihap sa mga mamumuno.
Narekober sa crime scene ang upat ka magazine, ingun man 116 ka mga kabhang sa bala sa M16 rifle.
Natusak-tusak ang lawas sa biktima kung diin matud pa, nabu-ak ang ulo niini ug migawas ang utok.
Nagkanayun si PSSg. Aralar nga nagpadayun karun ang ilahang imbestigasyon sa maong panghitabu, ingun man sa pagsuta sa motibo sa nilu-ug nga krimen.
