CEBU — Gikalingawan sa netizens ang mga tinun-an sa Saint Joseph Academy sa lungsod sa Sariaya, Quezon human sa ilang ‘#NoBagDay’ ning bag-o lang.
Madasigon nga gisalmotan sa mga tinun-an sa Senior High School ang aktibidad diin nalingaw sila sa pagdala sa ilang talagsaon o “unusual nga mga bag” sa eskwelahan.
Sumala sa usa ka post sa Supreme Student Government – Saint Joseph Academy Facebook Page nga isip usa ka bahin sa creation celebration nagdala ang mga Josephinian sa ilahang talagsao nga mga bag nga maoy sudlan sa ilang mga libro, portfolio, ug pagkaon.
Samtang, pipila sa mga tinun-an ang nagdala og bayong , case sa beer, maleta, hawla sa iro, balde, ice cooler ug uban pa, ug miduyog usab ang mga magtutudlo sa maong kalihokan diin gamit nila isip bag ang mga fishnet ug sako sa bugas.
