CEBU – Gikatahong giputlan og dila ang usa ka taxi driver sa giingong duha ka mga tulisan sa ala 1:00 sa kaadlawon sa Martes, Abril 12, 2022 sa may Brgy. Pitalo, lungsod sa San Fernando, habagatang Sugbo.
Giingong nagpahatod sa driver ang duha ka giingong mga tulisan gikan sa Banawa, Brgy. Guadalupe, Dakbayan sa Sugbo ngadto sa San Fernando.
Giila ang biktima nga mao si Andres Alfanta, 52, taga Brgy. Cantao-an, dakbayan sa Naga, driver sa Hadjie Taxi.
Malampusong operahan si Alfanta sa doktor sa Cebu South Medical Center, kanhi Talisay District Hospital, pinaagi sa pagtahi og balik sa dila nga giputol sa giingong tulisan.
Matod pa ni Police Corporal Mario Paul Pino, imbestigador sa San Fernando Police Station, nga wala pa nila mailhi ang duha ka mga tulisan nga gihulagway ni Alfanta nga hingkod ang panuigon apan wa niya maklaro ang mga nawong kay naka facemask ug nagkawo.
Matud ni Pino nga naglisod sila sa pagsabot sa paghulagway ni Alfanta gumikan di pa makasulti og tarong gumikan sa samad sa dila.
Apan nibutyag kini nga padulong na kini mopauli sa dakbayan sa Naga dihang gipara siya sa duha ka mga tawo sa may Banawa, Guadalupe.
Nagpahatod kini kaniya sa San Fernando ug nisanong na lang sab siya kay padulong siya mogarahi.
Sa ilang pag-abot sa unahan og gamay sa barangay hall sa Pitalo, ang mga tulisan ningdeklarar og tulis dayon gitiunan siyag armas ug kutsilyo.
