MANDAUE CITY-Padayon ang imbestigasyon sa kapulisan sa kamatayon sa usa ka taxi driver kansang patayng lawas nga napalgang naglutaw sa ilalom sa Mactan Fernan Bridge gahapon, Hulyo 16 ning tuiga.
Nasayran nga ang mga residente duol sa Pajara Park, Brgy. Umapad sa dakbayan sa Mandaue nadiskubrehan ang lawas sa usa ka patay nga naglutaw-lutaw.
Giila ang biktima nga si Ruben Zamora Remolino diin ang iyang taxi nga gimaneho anaa nakaparada sa entrada sa naasoy nga park, uban sa mga saksi nga nag-ingon nga ang sakyanan gi-parking didto sulod na sa duha ka adlaw.
Ingon man nga usa sa mga gipanglantawan sa mga otoridad kay ang posibilidad nga pagkutlo sa kinabuhi ug foul-play.
Sa inisyal nga findings sa mga imbestigador, gisaysay ni Police Lt. Col. Mercy Villaro, ang tigpamaba sa Mandaue City Police Office, nga nakaangkon og mga bun-og sa nawong ug ubang bahin sa lawas ang biktima.
Ug ang pamilya sa biktima nga midangop sa pag-angkon sa lawas ni Remolino, nitug-an sa kapulisan nga ang namatay nga taxi driver nisuway na usab sa pagkutlo sa iyang kinabuhi kaniadto.
Dugang pa nga ang operator sa taxi driver nipaambit ngadto sa mga imbestigador nga ang biktima bag-o lang nakigbuwag sa iyang asawa, ug posibleng nakaapekto kini sa iyang pangisip.
Samtang, ang pamilya ni Remolino nakahukom nga dili na ipaubos sa autopsy ang lawas sa ilang kabanay apan, matud ni Villaro na padayon gihapon ang ilang imbistigasyon.
