CEBU – Nanawagan ang grupong Teacher’s Dignity Coalition (TDC) nga i-balhin sa laing petsa ang pag-abli sa klase gumikan kinahanglang tagaan og eksaktong pahuway ang mga magtutudlo para makapangandam sa umaabot nga pagbukas sa face-to-face (F2F) classes.
Kini human nipakanaog na og desisyon ang Department of Education (DepEd) mahitungod sa pag-abli sa klase alang sa S.Y. 2022-2023 diin mipirma si Vice President ug DepEd Secretary Sara Duterte sa DepEd Order No. 34, s. 2022 nga nagtakda sa Agosto 22 isip unang adlaw sa pag-abli sa klase.
Sa eksklusibong pakighinabi sa Bombo Radyo Cebu kang Raul Constantino , ang presidente sa Teacher’s Dignity Coalition (TDC) Central Visayas, gitataw niini nga angayan una hatagan og bakasyon ang mga magtutudlo gumikan niadto pang Hunyo 24 opisyal nga nahuman ang klase sa SY 2021-2022 apan hangtod karon daghan pang magtutudlo ang padayong mitaho sa ilahang tagsa-tagsa ka tunghaan.
Ug kung ugaling dili na masibog ang pag-abli sa klase karong umaabot Agosto 22, walay mahimong pahuway ang mga magtutudlo kansang andam gihapon nga mobuhat sa ilahang mga responsibilidad.
Gihimug-atan ni Constantino, nga angayan lang nga ihayag ngadto sa magtutudlo ang pahuway nga alang kanila gumikan dili pareha sa ubang mga trabahante sa gobyerno, walay vacation , sick leave o uban pang matang sa leave ang mga magtutudlo.
Tino pa niini nga gitaganan ug katungod sa mga magtutudlo nga makabaton og 60 ka adlaw o katumbas sa 2 ka buwan nga school break.
Hinuon, bisan paman sa gipagawas nga pamahayag ni Duterte-Carpio magpabilin silang mohangyo alang sa usa kadayalogo aron madungog sa Bise-Presidente ang ilahang yango-ngo.
