Nagtinguha si Defense Secretary Gilbert Teodoro Jr. sa pagtukod og “expeditionary navy” aron panalipdan ang mga barko ug mga mangingisda samtang padayon nga gipalambo ang industriya sa kadagatan sa Pilipinas.
Gitambongan sa pipila ka mga maritime experts, government officials, ug mga akademiko ang gipahigayon nga 3rd Balangay Forum agig pagtimaan sa 2026 Maritime Archipelagic Nation Awareness Month.
Atol sa maong forum, gipasiugda ni Teodoro nga dugay na nga importante nga bahin sa inadlaw-adlaw nga kinabuhi sa mga Pilipino ang kadagatan.
Nakapokus usab ang mga diskusyon sa pagpalig-on sa “blue economy” sa nasod, diin gipasiugda ni Teodoro ang potensyal niini sa pagpalambo sa malungtarong kahimtang ug pag-uswag sa nasod, ilabi na bahin sa mga supply chain.
Gihisgutan usab ni Teodoro ang hustong paggamit sa mga kahinguhaan sa kadagatan aron masuportahan ang nagkadako nga populasyon sa Pilipinas nga nagpuyo sa yuta.
Matod niya, ang pagbaton og lig-on nga pwersa militar importante alang sa dugang nga paglambo sa ekonomiya nga nakabase sa kadagatan.
