Niingon si Presidente Ferdinand R. Marcos Jr. nga panahon na nga atubangon ni kanhi Negros Oriental Rep. Arnolfo Teves Jr. ang mga kasong kriminal nga gipasaka batok kaniya karon nga nauli na siya sa Pilipinas.
Sa usa ka video message nga gi-upload sa opisyal nga Facebook page sa Presidential Communications Office (PCO), niingun ang Presidente nga angayan na nga atubangon ni Arnie Teves ang hustisya, ug usab, gi abi-abi ni Marcos ang desisyon sa Timor-Leste nga ibalik si Teves sa Pilipinas.
Dugang sa Presidente, namatikdan niya nga una siyang gipahibalo sa kalamboan ni Timor-Leste Prime Minister Xanana Gusmão atol sa bag-o lang natapos nga 46th Association of Southeast Asian Nations Summit sa Kuala Lumpur, Malaysia.
Si Teves nag-atubang og daghang kasong kriminal, lakip ang high-profile assassination ni kanhi Negros Oriental governor Roel Degamo niadtong 2023 ug uban pang kaso sa pagpatay niadtong 2019.
Sa laing video gikan sa Presidential Communications, gipahibalo nga si Teves gidakop pinaagi sa warrant nga gi-isyu sa Manila Regional Trial Court (RTC) niadtong Septiyembre 2023 tungod sa 10 counts of murder, 12 counts sa frustrated murder, ug upat ka counts sa attempted murder.
Niadtong 2024, ang Dumaguete RTC nipagawas usab og arrest order batok kang Teves tungod sa kasong murder, illegal possession of explosives, illegal possession of firearms, ug sa paglapas sa Terrorism Financing Prevention and Suppression Act.
Subay sa Section 25 sa Republic Act 11479 o ang Anti-Terrorism Act of 2020, si Teves ug 12 ka uban pa ang gitudlo ubos sa Resolution 43 (2023) sa Anti-Terrorism Council isip mga lider sa teroristang organisasyon alang sa “orchestrated killings and acts of violence in Negros Oriental.”(Bombo Irene Ardiente)
