LAPU-LAPU CITY – Gitun-an na karun sa Lapu-Lapu City Legal Office ang pagpasaka ug kaso sa nagpakatap ug ‘fake news’ pinaagi sa usa ka text message kalabot na 2019 novel coronavirus (NCoV).
Gibutyag ni Lapu-Lapu City Mayor Junard “Ahong” Chan nga dili niini tugotan ang mga susama nga mensahe diin makamugna ug ‘panic’ sa mga tawo ilabi na sa mga Oponganon.
Matud pa nga nakuha man nila ang cellphone number sa nagpakatap ug ‘fake news’ ug ilaha na lang suta-on karun ang ‘identity’ sa maong ‘texter’.
Samtang, giangkon usab ni Mayor Chan nga apektado gayud ang turismo sa dakbayan sa Lapu-Lapu gumikan kay dili naman basta makasulod ang mga Chinese tourists gumikan sa CoV outbreak.
Sigon pa sa opisyal nga ang mga Chinese nationals ang usa sa ilahang top tourists.
Giingong mikunhod gayud ang ilahang Chinese tourist arrivals.
Hinuon, gitataw ni Chan nga mas maayo na lang kini inay nga magkumpyansa.
Sa pagkakarun, padayon ang ‘close monitoring’ sa City Health Office sa Lapu-Lapu sa mga Chinese nga musulod sa syudad arun nga dili gayud makasulod ang coronavirus.
