Miulbo na usab ang tensyon tali sa Thailand ug Cambodia human ang Thailand naglunsad og mga air strike sa ilang gikuwestiyon nga utlanan sa Cambodia, matod sa militar sa Thailand niadtong Lunes, Disyembre 8.
Kini nahitabo human ang duha ka nasud nag-akusar sa us-usa sa paglapas sa usa ka kasabutan sa ceasefire nga gipasiugdahan ni US President Donald Trump.
Sa usa ka pahayag, gikumpirma sa militar sa Thailand nga usa ka sundalong Thai ang namatay ug upat ang nasamdan sa mga pag-atake sa Cambodia sa duha ka mga lugar sa pinakasidlakang probinsya sa Ubon Ratchathani.
Agi’g tubag, ang bahin sa Thailand nagsugod na sa paggamit og mga eroplano aron maigo ang mga target sa militar sa Cambodia sa lainlaing mga lugar.
Sa bahin sa Cambodia, ang defense ministry nag-ingon nga ang militar sa Thailand giingong naglunsad og mga pag-atake sayo sa buntag sa mga pwersa niini sa duha ka mga lokasyon pagkahuman sa daghang mga adlaw nga paghagit ug nga ang mga tropa niini wala mobalos.
Mahinumduman nga ang panaglalis sa utlanan miulbo sayo ning tuiga sa buwan sa Hulyo, nga nakapatay og 48 ka mga tawo ug nakapahawa sa 300,000.
Nahunong ang panagsangka human miepekto ang kasabutan sa hunong-buto nga gipasiugdahan ni Malaysian Prime Minister Anwar Ibrahim ug Trump, kinsa parehong nakasaksi sa pagpirma sa gipalapdan nga kasabutan sa kalinaw tali sa duha ka nasud sa Kuala Lumpur, Malaysia niadtong Oktubre.
