Nakatala ang Thailand sa unang namatay tungod sa anthrax human gikumpirmar sa mga opisyal ang duha ka kaso sa impeksyon ug gatusan ang posibleng naladlad sa bacteria.
Sumala sa mga opisyal, gibana-bana nga 638 ka mga tawo ang na-expose ug kadaghanan kanila mikaon sa hilaw o dili luto nga karne.
Diin sa maong ihap kay 36 ang mitabang sa pag-ihaw sa mananap samtang ang tanan gihatagan og antibiotics isip kabahin sa containment measures.
Mideklarar ang Department of Livestock og 5-kilometer quarantine zone sa palibot sa maong lugar ug nagplano sa pagbakuna sa 1,222 ka baka, bisan og wala pay mga mananap nga nagpakita og sintomas o wala masaysay nga kamatayon.
Ang anthrax usa ka talagsaon apan seryoso nga sakit sa bacteria nga kasagaran makuha pinaagi sa pagkontak sa mga hayop o pagkaon sa kontaminado nga karne, apan dili kini mapasa gikan sa tawo ngadto sa tawo.
Sa pagtaas sa mga kaso sa anthrax sa rehiyon—sama sa 129 ka kaso ug usa ka kamatayon sa Laos sa miaging tuig, ug 13 ka kaso sa Vietnam niadtong Mayo 2023—ang Thailand nagpadayon sa pagkaalerto, ilabina sa mga utlanan niini.
