CEBU – Nagamit pag-usab ang mga toxic waste nga gikan sa minahan human nakadiskubre ang grupo sa mga engineers ug artist sa Ohio University sa Amerika unsaon kini pagrecycle ug himoong pintura aron makamugna ug mabulukon nga mga obra.
Sa usa ka taho, gikolekta sa grupo sa mga engineers, artist ug environmentalist ang acid mine drainage (AMD) nga nag-agas gikan sa gibiyaan nga mga minahan.
Makita nga halos puwa na ang kolor sa kontaminado nga suba ug yuta sa Sotheast Ohio tungod sa sulfuric acid ug iron oxide, nga mga sangkap usab sa paghimo sa pintura.
Gikan sa hugaw nga tubig, gisala ang iron ug dayon gipauga ug dugmokon aron makahimo ug pigment nga mag-usab-usab ang kolor sa lainlaing temperatura.
Gipaningkamotan sa grupo ang pagpalapa sa produksiyon sa recycled ug malungtarong pintal ug lakip ang water-treatment initiative aron sa paglimpyo ug pagpasig-uli sa kinabuhi sa mga sapa ug mga suba sa maong dapit.
