Ipatuman sa Cebu City Transportation Office (CCTO) ang usa ka traffic management plan sa Natalio Bacalso Avenue sa Barangay Basak Pardo ning dakbayan sa Sugbo alang sa ipahigayong localized center sa 2025 Bar Examinations sa University of San Jose – Recoletos (USJ-R) Basak Campus sugod karong adlawa sa Dominggo, Septiyembre 7, 2025.
Ipahigayon sab kini sa ubang petsa sa maong Bar Exams nga gikatakdang sa umaabot Miyerkules, Septiyembre 10 ug sunod Dominggo, Septiyembre 14.
Magsugod ang maong traffic scheme alas 2 sa kadlawn hangtod sa alas 7 sa gabii aron hatagan og higayon ang mga bar examinees sa hamugaway nga lugar atol sa pagsulod nila sa examination center.
Aduna kiniy striktong ipatuman nga “No Access” area, “Drop-off” area, ug “Examinee Lane” aron sa mas hapsay nga dagan sa trapiko sa maong dapit.
Ang USJ-R Basak ang bugtong nga tunghaan sa Sugbo nga gitugotan sa Korte Suprema nga local examination center sa edisyon karong tuiga sa bar exams.
