CEBU CITY- Nabalaka ang mga miyembro sa transport sector sa Cebu sa posibleng padayon nga pagsaka sa presyo sa produktong petrolyo human sa tensiyon ug kagubot sa Middle East.
Sa pakighinabi sa Bombo News Team, si Ellen Maghanoy, presidente sa Federation Cebu Transport Cooperative, miingon nga adunay kahadlok ang ilang sektor kung makaya pa ba sa mga drayber ug operators ang padayon nga operasyon kon mosaka pa ang presyo sa lana.
Matud ni Maghanoy, adunay mga hungihong nga posibleng mosaka ang presyo sa lana ngadto sa P90 matag litro, nga dako kaayong kabug-at alang sa transport sector.
Gipasabot usab niya nga direkta nga maapektuhan ang kita sa mga drayber ug operators kon magpadayon ang pagsaka sa presyo sa krudo.
Samtang, naglaum ang pederasyon nga adunay konkretong lakang ang gobyerno aron makwaan ang kabug-at nga gipas-an sa transport sector, ilabi na sa mga transport cooperatives nga nagserbisyo sa komunidad.
Tungod niini, misulat na sila sa Department of Transportation (DOTr) aron ipagawas ang budget alang sa fuel subsidy nga nagkantidad og P2.5 billion nga na-aprubahan alang sa 2025.
Sa dihang gipangutana kung mouyon ba sila sa posibleng pagsaka sa plete, miingon si Maghanoy nga wala pa kini nila gihunahuna sa pagkakaron, tungod kay ang pagtaas sa plete makadugang sa kabug-at sa mga commuters, ilabi na sa mga trabahante nga mag-commute adlaw-adlaw.
Gihatagan sab niya og gibug-atan nga kinahanglan bantayan sa gobyerno ang mga oil companies aron masiguro nga dili pataka og pasaka sa presyo, ilabi na kung adunay igo nga supply sa lana bisan pa sa tensiyon sa Middle East.
Sa pagkakaron, nagpadayon ang pakig-dialogo sa pederasyon sa mga lokal nga opisyal aron pangitaan og paagi nga maprotektahan ang interes sa ilang mga miyembro ug publiko.
