Giila ni Presidential Anti-organized Crime Commission (PAOCC) Executive Director Gilbert Cruz ang usa ka travel agency nga nalambigit sa pag-isyu sa mga kuwestiyonableng dokumento sa gobyerno ngadto sa mga langyaw nga posibleng “missing link” sa imbestigasyon sa Senado sa Philippine Offshore Gaming Operations (POGO).
Sa press briefing kahapong adlawa, Pebrero, 6. Ang hepe sa PAOCC nagkanayon nga niadtong Miyerkules, Pebrero 5, ang PAOCC sa pakigtambayayong sa PNP-Criminal Investigation and Detection Group (PNP-CIDG) nipahigayon og joint entrapment operation batok sa travel and visa consultancy firm nga JRB Travel and Consultancy Services Inc. sa Intramuros, Manila.
Miresulta kini sa pagkasikop nila Rosalie Bermas Bolaños ug Jaive Espolong Nobleta tungod sa ilegal nga pagproseso sa Philippine government identification cards alang sa mga langyaw.
Gipasabot pa ni Cruz nga bisan tuod nga ang maong mga dokumento sa gobyerno tinuod ug gi-authenticate sa mga ahensya sama sa Philippine Statistics Authority (PSA), siya miingon nga ang impormasyon ug unod niini nagpabilin nga kwestyonable.
Ang nasangpit nga mga suspek gidakop kay nagpakaaron-ingnon usab nga mga personahe sa PAOCC base sa reklamo sa mga reklamante, kinsa mga asawa ug kauban sa mga trabahante sa POGO.
Matod sa mga reklamante, gipangilkil sila og dakong kantidad, nga mokabat sa kapin sa usa ka milyon, aron maseguro nga buhian ang ilang mga langyaw nga kapikas ug mapugngan ang ilang deportasyon.
Gihulagway sa kadagkoan sa PAOCC nga usa ka dakong sindikato ang maong operasyon diin posibleng adunay kontak ang nahisgutang travel agency sa nagkadaiyang ahensya sa gobyerno, dili lang sa Bureau of Immigration kon dili lakip na sa PSA ug LTO.
Sa laing bahin, gipahibawo ni Bureau of Immigration spokesperson Dana Sandoval nga nasayran base sa record sa ahensya nga na-blacklist ang nasangpit nga travel agency ug ang nasikop nga suspek niadtong Abril 30, 2024 tungod sa ilegal nga binuhatan.
