Gibasura ni House Speaker Faustino “Bojie” Dy III ang travel clearance ni Ako Bicol Partylist Representative Zaldy Co ug nimando sa iyang hinanaling pagpauli sa Pilipinas sulod sa napulo (10) ka adlaw, taliwala sa “important national issues” nga gikinahanglan sa iyang presensya.
Sa usa ka sulat nga napetsahan sa Setyembre 18, 2025, gipahibalo ni Speaker Dy si Co nga ang iyang travel clearance alang sa personal nga pagbiyahe gibawi, ug kini epektibo dayon.
Matod ni Speaker Dy, ang pagbawi sa travel clearance ni Co alang sa kaayohan sa publiko ug tungod sa dinalian nga nasudnong isyu nga nagkinahanglan sa iyang pisikal nga presensya.
Gihatagan ni Speaker Dy si Rep. Co og 10 ka adlaw sa pagpauli, nga nag-ingon nga ang iyang hinanaling pagpauli gikinahanglan aron matubag ang mga isyu sa labing madali nga panahon.
Gihatagan usab og gibug-aton ni Speaker Dy nga si Co gilauman nga motuman dayon ug estrikto sa mando.
Si Speaker Dy nipasidaan nga ang kapakyas pagtuman sa iyang mando sulod sa gitakdang panahon makonsiderar nga pagdumili sa pag-ila sa legal nga proseso sa House of Representatives ug mahimong moresulta sa tukmang pagdisiplina ug legal nga aksyon.
