Posibleng masugdan na sa sunod tuig ang trial proper ni kanhi Presidente Rodrigo Duterte nga nag-atubang og kasong crimes against humanity sa International Criminal Court (ICC).
Matud pa ni ICC-accredited lawyer Gilbert Andres, bisan og daghan ang interesado nga sugdan dayon ang husay batok sa kanhi presidente, matod niya kinahanglan nga sundon ang due process alang niini.
Una, matod pa nga kinahanglang pamatud-an sa prosekusyon nga adunay igong hinungdan nga sugdan ang husay batok sa kanhi presidente.
Ang confirmation of charges nga hearing batok kang Duterte gikatakda sa umaabot Septiyembre 23 ug dinhi gipaabot nga mopresentar ang prosecution panel og duha ka testigo kauban sa ubang mga ebidensiya nga nahipos aron mahatagan og gibug-aton ang hangyo nga husayon ang napriso nga kanhi opisyal.
Human sa Septiyembre 23 nga pagdungog, hatagan og duha ka buwan o ang 60 ka adlaw ang Pre-Trial Chamber aron tun-an ang mga ebidensya nga gipresentar hangtod nga moluwat kini og resolusyon kon ipadayon ba ang husay o hingpit bang maabsuwelto ang kanhi presidente.
Kung magpadayon ang trial, giingon niya nga mahimong magsugod sa Enero ug Pebrero sa sunod tuig o sayo sa 2026 ang pagdunggog.
