Giisa sa Philippine Atmospheric, Geophysical and Astronomical Services Administration (PAGASA) ang lebel sa Tropical Cyclone Intensity Scale alang sa bagyo ngadto sa Tropical Storm Kiyapo, nga gilauman nga magpadayon sa pagdala og ulan sa daghang bahin sa nasud karong Biyernes, Hulyo 24.
Base sa weather bulletin sa PAGASA alas 3:00 sa kaadlawon, ang sentro sa Tropical Storm Kiyapo katapusang namonitor sa 355 kilometros sa sidlakan sa Aparri, Cagayan.
Ang bagyo adunay kusog nga hangin nga moabot sa 65 kilometros matag oras duol sa sentro, uban ang pagbugso sa hangin nga moabot sa 80 kilometros matag oras. Naglihok kini paingon sa kasadpan-amihanan-kasadpan sa gikusgon nga 30 kilometros matag oras.
Gawas sa epekto sa bagyo, ang habagat o southwest monsoon nakaapekto usab sa pipila ka bahin sa Visayas, Southern Luzon, ug Mindanao.
Gipahimangnoan sa PAGASA ang publiko nga magpabiling mabinantayon batok sa posibleng pagbaha ug pagdahili sa yuta tungod sa kasarangan ngadto sa kusog nga pag-ulan. Nagpabilin usab ang hulga sa kusog nga hangin sa mga lugar nga direktang maapektuhan.
Sumala sa forecast, posible nga mo-landfall ang Tropical Storm Kiyapo sa Babuyan Islands karong hapon ug gilauman nga mogawas sa Philippine Area of Responsibility (PAR) karong gabii.
Samtang, ang Metro Manila, CALABARZON, ang nahibiling bahin sa Central Luzon, MIMAROPA, ug Pangasinan mahimong makasinati og madag-umon nga kalangitan nga adunay kalat-kalat nga pag-ulan ug pagpangilat.
Ang maong mga lugar mahimo usab nga makaeksperyensya og pagbaha ug pagdahili sa yuta tungod sa kasarangan ngadto sa kusog nga pag-ulan.
