Gilauman nga makasinati og “danger” level nga heat index ang labing menos 51 ka mga dapit sa nasod karong adlawa, Biyernes, Mayo 29, sumala sa Philippine Atmospheric, Geophysical and Astronomical Services Administration (PAGASA).
Base sa lima ka adlaw nga forecast sa ahensya, ang kainit nga mabatyagan sa lawas gilauman nga mosaka gikan sa 42°C hangtod sa grabeng 47°C sa lainlaing mga bahin sa Pilipinas. Ang labing taas nga temperatura gipaabot nga motala sa maong 47°C didto sa Casiguran, Aurora ug Sangley Point sa Cavite City.
Samtang, moabot usab sa 45°C hangtod 46°C ang kainit sa mga dapit sa Cagayan, Bulacan, La Union, Isabela, Zambales, Pampanga, Nueva Ecija, ug Occidental Mindoro.
Sa laing bahin, anaa sa 44°C ang mamahimong forecast sa Metro Manila partikular na sa Science Garden sa Quezon City, ingon man sa pipila ka probinsya sa Ilocos Region, Calabarzon, Mimaropa, Bicol, tibuok Visayas, ug Surigao City.
Sumala pa sa PAGASA, adunay laing 24 ka mga dapit ang makasinati og “extreme caution” level gikan sa 35°C hangtod 41°C.
Taliwala sa maong nag-atubangay nga kainit sa nasod, pabilin nga luwas ug bugnaw ang temperatura sa Baguio City ug Benguet nga nagdula lang sa 20°C hangtod 26°C.
