Gilauman nga mokunhod ang gidaghanon sa mga bagyo nga moigo sa nasud atol sa usa ka “kusog kaayo” nga El Niño, apan sumala sa Philippine Atmospheric, Geophysical and Astronomical Services Administration (PAGASA), ang mga bagyong maporma posibleng mas kusgan ug mas makadaot.
Matod ni Ana Liza Solmoro-Solis, head sa Climate Monitoring and Prediction Section (CLIMPS) sa PAGASA, bisan mokunhod ang gidaghanon sa mga bagyo panahon sa El Niño, modako ang posibilidad nga kini mahimong mas intensibo ug delikado.
Sa pagkakaron, wala pa’y El Niño nga nasinati ang nasud, apan nagdahom ang PAGASA nga ang usa ka “very strong” nga El Niño mahimong motungha sa katapusang kwarter sa 2026.
Ang El Niño usa ka natural nga panghitabo nga nagdala og pag-init sa temperatura sa Kadagatang Pasipiko ug adunay dakong epekto sa klima sa Pilipinas, lakip ang mas taas nga hulaw, kulang nga ulan, ug kausaban sa pattern sa mga bagyo.
Tungod niini, nag-awhag ang PAGASA sa publiko ug mga lokal nga gobyerno nga mag-andam sa posibleng epekto sa mas kusgan nga mga bagyo, ilabi na sa mga lugar nga permi maigo sa kalamidad.
