Naangol ang upat ka indibidwal human giingong nawad-an og ‘brake’ ang usa ka Truck ug midaro sa usa ka motor nga kasugat sa National Highway sa Sitio Tambis, Barangay Poog, Siyudad sa Toledo pasado alas 9:00 sa buntag, Agusto 12, 2026.
Gimaneho ang maong truck ni Bienvenido Amarante, 67-anyos, minyo, ug residente sa Nalandan Tagpo, Bais City, Negros Oriental.
Samtang ang mga sakay niini nailhang sila si Sandy Mahinay, 30, ug si Alex Macalinao, 20, nga pulos lumulupyo sa Naga City, Cebu.
Samtang ang motorsiklo gimaneho ni Glydon Sabroso, 29, lumulupyo sa Barangay Magdugo, Siyudad sa Toledo kinsa gikataho nga nagmaniho nga walay lisensiya
Base sa imbestigasyon sa kapulisan, naglatas sila gikan sa Siyudad sa Naga paingon sa Lungsod sa Asturias kay mag-deliver sa ilang karga nga ‘feeds’ o mga lawg, apan pag-abut sa lugar giingong nawad-an og brake si Amarante hinungdan nga wala na niini makontrol ang truck.
Tungod niini, nalahus ug nabangga ang truck sa kongkreto nga gate sa Poog Catholic Church ug nadaro sab ang nakasugat nga motorsiklo ni Sabroso.
Nakaambak hinoun si Sabroso sa motor ug nakaangkon lang kini og minor injuries.
Samtang ang driver sa truck ug mga kaubanan niini ang daling gidala sa doul nga tambalanan tungod sa mga angol nga naangkon sa ilang kalawasan.
Sapagka karon, giandaman na ang kaso nga atubango sa driver nga Reckless Imprudence Resulting in Physical Injury and Damage to Properties.
