Naglunsad ang administrasyon ni U.S. President Donald Trump og kampanya aron ilahi ug buwagon ang International Criminal Court (ICC) tungod kay giisip niini nga usa ka hulga sa soberanya sa Estados Unidos.
Sumala sa report, si U.S. Secretary of State Marco Rubio miingon nga wala giila sa Estados Unidos ang awtoridad sa ICC sa pag-imbestiga o pagkiha sa mga katawhan ug opisyal sa Amerika.
Matud niya, ang korte milapas na sa orihinal nga katuyoan niini ug dili motugot ang administrasyon ni Trump nga hulgaon ang mga opisyal sa nasud.
Dugay nang gisupak nila Trump ug kanhi President George W. Bush ang awtoridad sa ICC sa pag-imbestiga sa mga Amerikano, ilabina sa mga miyembro sa militar.
Sumala sa usa ka opisyal sa U.S. Department of State, gikonsiderar sa administrasyon ang pagpatuman og travel restrictions, pagbawi sa visa, pagpakusog sa mga silot batok sa ICC ug mga kaubang organisasyon niini, ingon man diplomatikong presyur sa ubang mga nasud aron mohawa sa internasyonal nga tribunal.
Samtang, miingon ang tigpamaba sa ICC nga si Oriane Maillet nga wala pa sila’y komento bahin sa maong isyu.
