Nigahin ang administrasyon ni US President Donald Trump og pundo para sa Pilipinas aron masumpo ang illegal fishing sa disputed water.
Atol sa pagbisita sa nasud ni Principal Deputy Assistant Secretary of State for East Asian & Pacific Affairs Jonathan Fritz, iyang gipasalig nga ang US foreign aid gamiton sa pagwagtang sa ilegal nga pagpangisda, pagtukod og lig-on nga sektor sa enerhiya ug pagpalambo sa palibot sa negosyo sa nasud.
Partikular usab nga gipahayag sa opisyal nga usa sa ilang gitutokan mao ang pangisda. Ang opisyal sa US namahayag nga ang industriya sa pangisda usa ka importanteng bahin sa ekonomiya sa Pilipinas, apan matud niya nga adunay pipila ka mga silingang nasud ang nangawat sa mga kahinguhaan sa isda sa katawhang Pilipino.
Matod niya nga mao kini ang hinungdan nga ilang itutok ang ilang foreign assistance program sa pagtabang sa Pilipinas nga mas mamonitor ang ilegal nga pagpangisda ug pag-ila sa mga barko nga dili Pilipino nga nagkuha og resources gikan sa katawhang Pilipino nga walay pagtugot.
Gibutyag usab ni Fritz nga makigtambayayong sila sa mga mangingisda nga Pilipino aron mahimong front line, “eyes and ears” nga maghatag og real-time nga impormasyon sa mga lokal nga kagamhanan ug sa nasudnong kagamhanan kalabot sa illegal nga pagpangisda, pagkaguba sa coral reef, polusyon sa dagat ug uban pa.
Matod niya ang mga Pilipino maoy apektado sa ilegal nga pagpangisda, gikan man sa China o ubang kanasuran nga ilegal nga mangisda sa kadagatan sa atong nasud.
Gikumpirma usab sa opisyal sa US nga ang pagpatuman sa mga programa nakapunting sa mga probinsya nga duol sa gilalisan nga kadagatan.
Kahinumduman nga si Secretary of State Marco Rubio mipahibalo niadtong Hulyo nga ang US mohatag sa PH og bag-ong foreign assistance nga nagkantidad og $63 milyones o gibana-bana nga P3 bilyones.
