Gibasol ni U.S. President Donald J. Trump ang kanhi Presidente nga si Joseph R. Biden sa padayon nga pagsaka sa presyo sa mga palaliton sa Estados Unidos.
Gihimo ni Trump ang pahayag human sa usa ka pakigpulong sa White House diin sa usa ka mubo nga pakigpulong, gipasigarbo ni Trump ang mga nahimo sa iyang administrasyon, lakip ang giingong pagkunhod sa ilegal nga pagtabok sa utlanan ug pagpaubos sa presyo sa pipila ka mga produkto.
Gipahibalo usab sa Presidente ang pag-apod-apod sa usa ka “warrior dividend” nga $1,776 alang sa 1.45 milyon nga mga miyembro sa militar sa US ug ang iyang suporta alang sa usa ka sugyot sa publiko nga tabang pinansyal alang sa ilang mga gasto sa pag-atiman sa kahimsog.
Bisan tuod giangkon sa Presidente sa US nga nagpabilin nga taas ang mga presyo, gipasalig ni Trump nga ang ekonomiya “andam” nga mouswag sa sunod tuig tungod sa iyang mga palisiya sa buhis, mga taripa ug giplano nga mga pagbag-o sa pamunoan sa US Federal Reserve.
Samtang, gisaway sa mga Demokratiko ang pakigpulong ni Trump, nga nag-insister nga kulang kini sa konkreto nga mga solusyon sa problema sa affordability, hilabi na samtang nagkaduol ang eleksyon sa tunga-tunga sa termino sa sunod tuig.
