-- ADVERTISEMENT --

Gipasidunggan ni US President Donald Trump si Presidente Ferdinand “Bongbong” Marcos Jr. tungod sa maayong pag-abiabi ug sa malampusong pagpangulo sa Pilipinas isip chair sa Association of Southeast Asian Nations (ASEAN) Summit karong tuiga.

Sa iyang pamahayag atol sa panagtagbo sa mga lider sa ASEAN sa Manila, gipadayag ni Trump ang iyang dakong garbo nga makauban ang mga higalang lider sa rehiyon nga iyang gidayeg sa ilang maayong pagdumala sa ilang tagsa-tagsa ka nasod.

Matod sa presidente sa Estados Unidos, nahimong sentro sa hisgotanan sa tibuok kalibotan ang Pilipinas ug ang ASEAN gumikan sa talagsaong kalampusan niini ubos sa pagpangulo ni Marcos. Gihulagway usab ni Trump ang kasamtangang tuig isip usa ka “record year” alang sa maong rehiyonal nga pundok.

Gipaambit usab ni Trump ang iyang kalipay sa pagbalik sa Pilipinas, diin matod niya nakabisita na siya og makadaghang higayon kaniadto. Sa usa ka gaan ug personal nga bahin sa iyang pakigpulong, gihisgutan ni Trump nga suod niyang kaila ang mga ginikanan ni Presidente Marcos ug gidayeg niya kini.

“I believe in genetics. And they did a good job, you have very good genetics, I can tell you that,” matod pa ni Trump ngadto kang Marcos.

-- ADVERTISEMENT --