-- ADVERTISEMENT --

Mabulukon ug madasigon nga pasundayag sa kultura ang nagpakita sa labing maayong talento sa Pilipinas ug ASEAN diin nagtipon ang mga iladong lokal nga artista ug mga lider sa gobyerno.

Sa maong kalihokan, gihatagan og gibug-aton ang panaghiusa pinaagi sa musika ug sayaw. Diin gipasundayag sa sikat nga P-pop group nga SB19, ang batikang mag-aawit nga si Gary Valenciano, ug ang singer nga si Julie Anne San Jose ang ilang mga talento kauban ang UP Filipiniana Dance Group ug ang ASEAN Band.

Usa sa labing nakadani sa atensyon sa mga tumatan-aw mao ang pagsayaw mismo sa Presidente sa Timor-Leste kauban ang mga mananayaw sa entablado, diin malipayon kining nakig-uban sa mga lokal nga pasundayag ug nag-ani og dakong hugyaw ug pagdayeg gikan sa publiko.

Gihulagway ang maong pasundayag isip usa ka mahinungdanong selebrasyon sa kultural nga panag-uban sa rehiyon, nga nagpakita sa gahum sa arte ug musika sa pagkonektar sa nagkalain-laing nasud.