CEBU CITY-Dakung pangutana karun sa sakop sa kapulisan kung tinuod bagyud nga nahitabo ang pagpanulis ug pagkidnap sa tulo ka tawo nga nahitabo niadton Hulyo 10, 2023.
Kini human ang tulo ka giingong mga biktima nihatag og magkasumpaki nga testimonya kon asa nahitabo ang maong mga krimen atol sa imbestigasyon.
Gibutyag ni Police Colonel Ireneo Dalogdog, Cebu City Police Office (CCPO) director, nga ang giingong mga biktima, mihatag og tulo ka managlahing dapit diin sila giingong gitulis ug gikidnap.
Gitumbok ni Dalogdog mao ang mga giingong biktima nga sila si Jason Co, 49-anyos nga Chinese national ug negosyante; ug iyang duha ka giingong empleyado nga giilang sila Virgilio Lerin, 46; ug usa ka 16-anyos nga batang lalaki.
Matod ni Dalogdog nga sa una nangangkon ang mga giingong biktima nga nahitabo ang mga krimen sa Carbon Market sa dakbayan sa Sugbo.
Apan dihang niabot sa Carbon Police Station sa dakbayan sa Sugbo ang mga biktima nga giubanan sa mga polis sa Talisay City Police Station, ang mga biktima niingon nga duol ra sa Compania Maritima Building ang crime location.
Gumikan niini nakig-alayon si Police Major Miles Damoslog sa Carbon Police Station sa Waterfront Police Station diin nahimutang ang Maritime building aron masiguro nga magpadayon ang imbestigasyon.
Giingon sa mga biktima nga sila gitulis ug gikidnap alas 7 sa buntag niadtong adlawa. Apan sa dihang gisusi sa mga polis sa Waterfront ang footage sa mga CCTV sa maong lugar gikan alas 6 sa buntag hangtod sa udto niadtong tungora, walay nahitabong ug wala diha ang van nga giingong gisakyan sa mga biktima dihang nahitabo ang krimen. bisan unsa nga footage sa mga CCTV.
Sa dihang giatubang niini nga resulta, si Dalogdog niingon nga ang mga biktima giingong nag-ilis sa tuno ug mitudlo sa dapit sa Mabolo nga maoy dapit diin sila giingong gitulis ug gikidnap.
Matod usab ni Dalogdog nga ila karong gisusi kun hinimo ba lang sa giingong biktima ang senaryo aron dili makabayad og utang.
Kung mapamatud-an nga bakak ang ilang gitaho sa police, niingon si Dalogdog nga dili sila magpanuko sa pagpasaka og mga kaso nga alarms and scandal ug perjury batok sa maong mga tawo.
