CEBU CITY – Gikumpirmar ni Dr. Rene Josef Bullecer nga adunay kamatuoran ang pagtuon nga mas duol sa coronavirus disease 2019 (COVID-19) ang mga tawo nga adunay Type A nga dugo.
Matud ni Dr. Bullecer nga kung ugaling mataptan sa matang sa virus, dali kining maluya gumikan kay ang maong klase sa dugo ang hinay ug defence mechanism.
Subay niini, sugyot sa naasoy nga doktor sa mga tawo nga adunay type A nga dugo nga mas palig-unon pa ang resistensya, i-expose ang kaugalingon sa init sa adlaw matag alas 6 ngadto sa 7 sa buntag, ingon man ang pagkaon ug insakto ug pagkatulog ug 7 ngadto sa siyam ka oras.
Gipahibalo usab ni Bullecer nga maigo sa maong virus dili lang ang mga tawo nga nag-edad ug 60 anyos pataas, inay lakip na ang mga nag-edad ug 50 anyos paubos, ug giingong kadaghanan niini ang kadtong adunay daan nang gipamati sa lawas.
Gikabalak-an pa sa maong doktor nga ang kasamtangan nga kapin 3,000 ka mga kaso nga natala lukop Pilipinas, ang giingong wala pa makatunga sa ‘actual cases’ sa nasud.
