CEBU – Hugot nga seguridad ang gipatuman sa unang adlaw sa 2022 Regionalize Bar Examinations sa dakbayan sa Sugbo diin daghang mga kapulisan, traffic enforcers ug mga force multipliers ang gipakatap.
Sa pakighinabi sa Bombo News Team kang Police Lt. Rolando Amor, ang deputy station commander sa Pari-an Police Station, iyahang gibutyag nga wala may ‘untoward incidents’ nga natala sulod ug sa palibot sa University of San Carlos – Main Campus ug hapsay lang ang dagan sa eksaminasyon.
Matud pa, kutob lang sila karung alas 7 sa gabii hangtud nga mahuman ang gipahigayon nga eksaminayon sulod sa naasoy nga unibersidad.
Gawas sa seguridad, hugot usab nga gibantayan sa mga sakop sa Cebu City Transportation Office (CCTO) ang dalan Junquera corner Sanciangko ug Pelaez, arun sa pag-‘manned’ sa trapiko diin ang naasoy nga mga dalan ang gipangsirad-an subay sa gipahigayon nga eksaminasyon.
Gibutyag ni Junard Bautista, ang CCTO Supervisor sa USC Campus, nga ilahang gi-giyahan ang mga sakyanan arun nga dili maghuot ang trapiko ingon man nga walay mag-busina sa palibot sa unibersidad.
Gidili sa mga sakyanan ang pag-busina arun nga dili kini makabalda sa mga bar takers.
Duha ka shift usab ang gipatuman sa CCTO, diin walo ka mga traffic enforcers sa buntag, ug walo usab sa hapon.
Mao usab ang gipatuman nga seguridad sa usa ka venue nga mao ang University of Cebu – Banilad Campus diin gipakatap ang kapulisan ug gani lakip ang mga tigbalita kay dili mahimong mo cover sa eksaminasyon ug hugot nga gidili ug pagkuha ug mga hulagway o videos sa unibersidad.
