Nahuman na ang unang pagdungog sa International Criminal Court sa The Hague, Netherlands sa kasong crimes on humanity batok kang kanhi Presidente Rodrigo Duterte.
Ang 79-anyos nga kanhi presidente wala makatambong sa personal busa gitugotan lang kini pinaagi sa video conference.
Milungtad og kapin sa 35 minutos ang hearing diin mibarog isip abogado ni Duterte si kanhi Executive Secretary Atty. Salvador “Bingbong” Medialdea.
Matod ni Presiding Judge Iulia Motoc nga tungod kay confirmation hearing lang kini, wala nila tugoti ang mosyon sa kampo ni Duterte nga i-postpone kini sa sunod semana kon mahimo.
Gitataw ni Medialdea nga hatagan unta sila og igong panahon sa pagpasabot sa mga proseso sa pagdungog ngadto sa kanhi presidente apan gibasura kini sa ICC.
Gipaambit usab ni Medialdea nga dili makiangayon ang pagdakop sa ICC sa kanhi presidente.
Gitakda sa ICC ang sunod nga pagdungog sa Septiyembre 23, 2025 aron makapangandam og maayo ang kampo sa kanhi presidente nga dinakpan na.
