MANDAUE CITY-Gilusad sa Mandaue City Government ang ilang unang “Kadiwa ng Pangulo” sa Mandaue City Hall Ground sa Barangay Centro gahapon, Pebrero 15, 2024.
Ang maong kalihukan gitambungan nila ni Vice Mayor Glenn Bercede, mga Konsehal, ug uban pang mga opisyal sa naasoy nga dakbayan.
Nasayran nga ang ‘one-stop-shop center’ nagtanyag og locally made nga mga produkto sa mga persons deprived of liberty gikan sa Mandaue City Jail ug uban pang mga organisasyon nga adunay mga produkto nga gusting ibaligya sama sa mga utanon ug sabon nga gibaligya sa barato nga presyo kon itandi sa regular nga kamerkaduhan.
Sa pakighinabi sa Bombo Radyo Cebu News Team kang Sharon Mangadlao, ang officer in charge sa City’s Agriculture Office-Mandaue, dako og tabang ingon man oportunidad alang sa mga mag-uuma nga adunay venue diin makahigayon sila og baligya sa ilang mga produkto nga direkta sa mga konsumidor.
Dugang pa niini nga gibana-banang kapin sa 3,000 ngadto sa 4,000 ka mga mag-uuma ang rehistrado sa City’s Agriculture sa Dakbayan sa Mandaue ug gawas pa kini sa nagpadayon nga rehistrasyon diin gilauman usab sa ahensya nga mosaka pa ang nasangpit nga gidaghanon.
