Magsugod karong Lunes ang diskusyon bahin sa Article II o “unexplained wealth,” human makompleto sa prosekusyon ang pagpresentar sa ebidensya may kalabotan sa giingong sayop nga paggamit sa confidential funds.
Sumala ni Prosecution legal spokesperson Atty. Benjamin Tolosa, susihon sa prosekusyon ang mga bank account ni Bise Presidente Sara Duterte, lakip ang mga rekord sa BIR ug AMLC.
Matod ni Tolosa, dili na kinahanglan nga mopresentar pa sila og dugang nga mga saksi tungod kay igo na ang ilang mga ebidensya, lakip ang testimonya sa mga bank manager, Special Disbursing Officers, COA auditors ug PSA officials.
Giingon niyang gipamatud-an sa maong mga testimonya ang mga isyu sa OVP ug DepEd, lakip ang cash withdrawals, giingong paglapas sa accounting rules, kakulang sa mga resibo ug mga ngalan sa acknowledgement receipts nga wala motakdo sa rekord sa PSA.
Bisan pa niini, giklaro ni Tolosa nga ang mga senator-judge maoy magbuot kung igo ba ang ebidensya alang sa kombiksyon.
Samtang, magpabiling bukas ang Article I aron hatagan og higayon ang mga senator-judge nga motawag og dugang nga mga saksi kung gikinahanglan.
