CEBU CITY — Plano sa Police Regional Office 7 nga ipatawag ang administrasyon sa University of the Philippines-Cebu human ang nahitabong lihok protesta niadtong Hunyo 5 sa atubangan mismo sa ilahang campus.
Gibutyag ni PRO 7 Regional Director Brigadier General Albert Ignatius Ferro nga mangayo sila ug pagpasabot sa kadagkuan sa UP-Cebu kung suportado nila ang nahitabong protesta.
Matud pa nga usa ka state university ang UP hayan angayan nga mahimo kini silang makabayan ug dili musuporta sa bisan unsa man nga anti-government protest.
Hinuon, gitataw ni Ferro nga katungod usab sa maong mga raliyista ang magpahigayon ug protesta diin nakalatid usab sa Bill of Rights.
Apan sa panahon sa pandemya, hangyo sa heneral nga likayan ang mass gathering arun nga malayo sa kontaminasyon sa coronavirus disease 2019.
Gipasabot pa niini nga wala nila gisikop ang mga raliyista gumikan sa gipahigayon nga lihok protesta, inay gumikan sa gilapas nga community quarantine protocol nga nagdili sa mass gathering.
Samtang, karung adlawa usab ipaubos sa inquest proceeding ang walo ka mga dinakpan nga anaa sa gihapon sa kustodiya sa Cebu City Police Office temporary detention cell. (sbr/gn)
