Nagpagawas ang Department of Health (DOH) og updated guidelines aron mapugngan, ma-detect ug madumala ang mpox o kanhi nailhan nga monkeypox sa Pilipinas.
Basi sa gipagawas nga 8 ka pahina sa Department Memorandum No. 2024-0306 nga gilagdaan ni Health Secretary Ted Herbosa, nagtambag sa tanan nga likayan ang close skin-to-skin contact sama sa pakighilawas, paghalok, paggakos sa tagsa-tagsa ka mga suspected individual, probable o kumpirmadong kaso sa mpox o kung dili kalikayan, gitambagan ang mga caregiver nga mogamit ug angay nga personal protective equipment (PPE).
Ikaduha, ang kanunay ug husto nga paghinlo sa kamot kinahanglan nga bantayan pinaagi sa paggamit sa alkohol o paghugas sa mga kamot kung hugaw o kontaminado.
Ikatulo, kinahanglan nga masiguro nga ang mga butang ug mga lugar nga kontaminado sa virus o mahikap sa usa ka nataptan nga indibidwal kinahanglan nga hingpit nga limpyohan ug ma-disinfect.
Sa katapusan, gitambagan usab ang publiko nga likayan ang pagkontak sa mga hayop, ilabi na kadtong nagdala sa virus, ingon man ang mga masakiton o patay nga mga hayop nga makit-an sa mga lugar nga adunay mpox.
Ang tanan nga mga healthcare providers gimandoan usab sa pag-obserbar sa usa ka ‘high index of suspicion’ alang sa mpox kung susihon ang mga indibidwal nga nagpakita mga sintomas sa sakit sama sa wala mahibal-an nga rash, mucosal lesion o lymphadenopathy.
Kinahanglan usab sila nga mopahibalo sa DOH kung adunay gidudahan probable o kumpirmadong kaso sa mpox sulod sa 24 oras gikan sa pagkakita sa virus.
Samtang, ang tanang suspek ug posibleng kaso sa mpox kinahanglang ipasusi alang sa kumpirmasyon sa laboratoryo sa mpox virus.
Gidugang ni Sec. Herbosa, ang updated nga mga guidelines sa Mpox sa DOH gimugna sa mga Filipino expert alang sa Filipino community subay sa international response.
