ZAMBALES-Nidonar ang Amerika og communication tower alang sa Philippine Coast Guard (PCG) station sa Zambales.
Kini aron mapalambo pa ang monitoring sa West Philippine Sea.
Matod ni Commander Euphraim Jayson Diciano, hepe sa PCG station sa Zambales, ang maong programa gihimo alang sa pormal nga pagdawat sa donasyon sa lungsod sa Botolan diin tukoron ang bag-ong pasilidad.
Nasayran nga ang mga representante gikan sa US Embassy Civil Military Support unit, mga opisyal sa PCG ug mga ehekutibo sa lokal nga gobyerno ang mitambong sa programa.
Ang nasangpit nga tore tukoron sa 225 square meter nga propyedad nga gipalit sa lokal nga kagamhanan sa Botolan gikan sa pribadong tag-iya aron i-denominate sa PCG.
Gidugang ni Commander Diciano, nga ang estratehikong lokasyon sa pasilidad sa Mount Calib-ungan sa Barangay Porac, Botolan maghatag og halapad nga radio coverage aron mapadali ang komunikasyon sa mga barko sa PCG ilabi na sa pagpahigayon og patrol operations sa Panatag shoal ug uban pang kasikbit nga mga dapit.
