Gipalapdan sa U.S. State Department ang pag-screen sa mga social media account sa mga foreign journalist nga nag-aplay og visa aron magtrabaho sa Estados Unidos.
Kabahin kini sa mas hugot nga immigration policy sa administrasyon ni U.S. President Donald Trump sa iyang ikaduhang termino.
Kinahanglan nga isumiter sa mga aplikante ang ilang social media accounts alang sa pagrepaso sa mga opisyal sa U.S., lakip ang pipila ka mga aplikante sa work visa gikan sa Canada ug Mexico.
Matud sa State Department, gigamit niini ang gitawag nga “online presence vetting” aron masiguro nga ang mga aplikante mosunod sa balaod sa U.S. ug dili hulga sa nasudnong seguridad ug kaluwasan sa publiko.
Wala pa matino kung kanus-a ipatuman ang maong gipalapdan nga polisiya.
Samtang, nagpatunghag kabalaka ang pipila ka civil liberties advocates, tungod sa posibleng epekto niini sa kagawasan sa pagpamahayag.
Una niini, gisusi usab sa U.S. Citizenship and Immigration Services ang social media activity sa pipila ka mga imigrante ug visa applicants isip bahin sa seguridad screening.
