Nakatala ang usa ka 97-anyos nga lola sa United Kingdom og duha ka Guinness World Records human siya miapil sa “wing walking” ug nakasinati sa “loop-the-loop” nga maniobra samtang anaa sa kahanginan.
Si Betty Bromage ang naghupot sa mga rekord isip “oldest wing walker (babaye)” ug “oldest person to perform a loop-the-loop wing walk (babaye)” sa edad nga 97 anyos.
Ang “wing walking” usa ka stunt diin ang tawo magbarog o gihigot ibabaw sa pako sa eroplano samtang kini naglupad. Gihimo ni Betty ang maong stunt niadtong Agosto 4 aron makatigom og pondo alang sa usa ka charity sa ospital.
Dili na bag-o kang Betty ang “wing walking,” tungod kay una niyang nakuha ang rekord isip “oldest wing walker” niadtong 2022, sa dihang 93 anyos pa siya.
Sa iyang pinakaulahing pagsulay, dili lang niya nabuak ang iyang kaugalingong rekord apan nakatala usab siya og bag-o.
