CEBU CITY-Gipaubos sa yellow category sa area of concern ang usa ka barangay sa lungsod sa Balamban, alang sa umaabot nga Oktubre 30 nga Barangay ug Sangguniang Kabataan Elections (BSKE) human sa insidente sa pagpamusil nga miresulta sa kamatayon sa usa ka incumbent barangay councilor sa maong dapit.
Ang Barangay Cansomoroy, sa Balamban, karon usa ka area of concern ubos sa yellow category human si Anastacio Pacquiao, 60-anyos nga incumbent barangay councilor sa Brgy. Cansomoroy, gipusil-patay niadtong Oktubre 5, 2023.
Subay niini, padungagan sa Cebu Police Provincial Office (CCPO) og mga sakop sa kapulisan ang Balamban municipal police station.
Mao kini gibutyag ni Police Colonel Percival Zorilla, ang hepe sa CCPO.
Matod sa opisyal nga kini aron masiguro ang ang kaluwasan sa mga botante sa adlaw sa piniliay ug ingon sa tanang lumulupyo sa Barangay Cansomoroy.
Gidugang usab ni Zorilla nga andam ang ilahang buhatan sa pagpakatap sa ilahang Quick Reaction Teams aron respondehan ang bisan unsang matang sa kakulian nga mahitabo sa tibuok lalawigan sa Sugbo.
